Presidenti Ilir Meta dekreton anëtarin e shtatë të Gjykatës Kushtetuese

Presidenti i Republikës, Ilir Meta, ka dekretuar mbrëmjen e kësaj të hëne Sonila Bejtjan, si anëtare të shtatë të Gjykatës Kushtetuese. Lajmi u konfirmua nga vetë institucioni i presidencës përmes një njoftimi të shpërndarë për mediat.

“Presidenti Meta, pasi u njoh dhe vlerësoi praktikën dokumentare të vendimmarrjes së Këshillit të Emërimeve në Drejtësi; si dhe duke vlerësuar njëkohësisht nevojën jetike që ka vendi për plotësimin dhe funksionimin sa më parë, e mbi të gjitha në mënyrë të qëndrueshme të Gjykatës Kushtetuese, në përfundim të shqyrtimit, në mbështetje të neneve 93, 125 pika 1, 127 pika 3, 129, 149/d pika 1, të Kushtetutës së Republikës së Shqipërisë, ka vendosur që: Zonja Sonila Bejtja të emërohet gjyqtar në Gjykatën Kushtetuese”, thuhet në dekret.

Këshilli i Emërimeve në Drejtësi emrin e znj. Bejtja ia përcolli pasditen e sotme kreut të shtetit, ndërsa ky i fundit nuk humbi aspak kohë, por zgjodhi ta dekretojë emrin e saj si anëtare e shtatë në Gjykatën Kushtetuese.

Bërja funksionale e Gjykatës Kushtetuese ka qenë një ndër apelet e përsëritura të ambasadorëve të SHBA dhe BE, të cilët vendosën 31 dhjetorin, si afatin e fundit për plotësimin e kuorumit.

Me emërimin e znj. Bejtja në Gjykatën Kushtetuese bëhen shtatë anëtarë, ndërsa plotësimi i saj i plotë kërkon edhe dy anëtarë të tjerë.

Kreu i shtetit në dekret thekson se këtë vendim e ka marrë duke pasur parasysh nevojën jetike që ka Shqipëria për bërjen funksionale sa më parë të Gjykatës Kushtetuese. Ngritja e saj ka qenë një ndër kushtet, që BE-ja kishte caktuar për Shqipërinë për mbajtjen e Konferencës së Parë Ndërqeveritare.

Kryediplomatja Yuri Kim, pak ditë më parë i tha Euronews Albania se pas plotësimit të Gjykatës Kushtetuese, projekti i radhës ku SHBA-ja do jetë e fokusuar është ngritja e Gjykatës së Lartë.

Lexoni gjithashtu: 

Ambasadorët Soreca dhe Kim përshëndesin emërimin e gjyqtarit të 7-të Kushtetuese

Vakancat në Gjykatën Kushtetuese, KED i çon emrin e radhës presidentit Meta

Ekskluzive/ Ambasadorja Yuri Kim: Gjykata Kushtetuese është funksionale, mos u shpërqendroni nga propaganda dhe konspiracionet