Serbia forcon raportet me Iranin, zv.ministri serb porosit armë në Teheran

Një delegacion serb ka vizituar fundjavën që lamë pas Iranin.

Lajmi është bërë me dije nga Ministria e Jashtme e Iranit, ku thuhet se zv.ministri i Jashtëm serb, Goran Aleksiç ishte në Teheran ku u takua me homologun e tij për të zhvilluar raundin e dytë të konsultimeve politike.

Në këtë raund konsultimesh, të bazuar mbi zhvillimet rajonale dhe ngjarjet ndërkombëtare, palët shprehën gatishmërinë për zgjerimin e bashkëpunimit ndërmjet Iranit dhe Serbisë në fusha të ndryshme.

Zëvendësministri serb e cilësoi vizitën e tij konstruktive dhe në përputhje me avancimin e marrëdhënieve ndërmjet Teheranit dhe Beogradit.

Ai nënvizoi  se politika e qeverisë serbe është zgjerimi i marrëdhënieve në të gjitha fushat me vendet mike, veçanërisht me Iranin. Duke vlerësuar mbështetjen e Republikës Islamike të Iranit për integritetin territorial të Serbisë, ai theksoi se Presidenti i Serbisë dëshiron të zhvillojë marrëdhëniet me Teheranin në të gjitha fushat ekzistuese.

Sipas disa mediave gjatë këtij takimi është folur se Beogradi do të blejë nga Teherani edhe armatime, por nuk ka një deklaratë zyrtare.

Kujtojmë se Serbia është duke blerë dronë nga Kina.