Dy civilë vriten nga granatimet ruse në Harkiv

Dy persona raportohet se janë vrarë nga granatimet ruse në lindje të Ukrainës më 26 gusht, përderisa Rusia ka raportuar për më shumë sulme me dronë, përfshirë edhe në Moskë.

Dy civilë u vranë pasi një granatë goditi një kafene në fshatin Podoli, në rajonin lindor të Harkivit, tha guvernatori rajonal, Oleh Synehubov.

Podoli ishte pushtuar pak pasi Rusia nisi pushtimin në shkallë të plotë të Ukrainës në shkurtin e vitit të kaluar, por ky fshat u rimor nga Kievi gjatë kundërofensivës së zhvilluar shtatorin e vitit 2022.

Forcat ruse gjatë javëve të fundit po tentojnë të lëvizin përpara në vijën e frontit në rajonin e Harkivit. Ushtria ukrainase ka pranuar se luftimet në këtë zonë janë bërë më të vështira, por ka thënë se ende po e mban vijën.

Në Rusi, më 26 gusht është raportuar për një sulm me dron në rajonin e Moskës, që detyroi autoritetet përkohësisht të pezullonin operacionet në tre aeroporte të mëdha në kryeqytetin rus.

LEXONI GJITHASHTU:

• “Lufta ka afruar popujt tanë”, Osmani pret që Ukraina të njoh pavarësinë e Kosovës
• Ukrainasit në Shqipëri: Përjetimet e luftës vështirë të harrohen