Balla: Komunikimi me publikun i Policisë së Shtetit po përmirësohet

Ministri i Brendshëm, Taulant Balla deklaroi përmes një postim në rrjetin social ‘Facebook’ se në kuadër të planit për të përmirësuar sigurinë në vend, do të përmirësohet komunikimi i Policisë së Shtetit me qytetarët.

Në reagimin e tij Balla thekson se publiku ëhstë partneri më i mirë i policisë për mbrojtjen e vendit dhe individëve nga krimet ordinere, ato të organizuara, por dhe kundër korrupsionit.

Ai thekson se çdo denoncim dhe ankesë e qytetarëve do të ndiqet me shumë kujdes nga ana e Policisë së Shtetit.

Postimi i plotë:

Komunikimi me publikun i Policisë së Shtetit po përmirësohet. Mos harrojmë asnjëherë se publiku është partneri ynë i pazëvendësueshëm në mbrojtjen e vendit dhe të çdo individi, nga çdo lloj paligjshmërie, që nga korrupsioni dhe krimi i organizuar, tek krimi ordiner dhe deri tek krimi ndaj pronës publike e private. Veshi i shurdhër dhe syri qorr i një polici, heshtja bashkëfajtore me të fortët e lagjes dhe mosreagimi i forcave të rendit ndaj denoncimeve të qytetarëve, janë rreshtim i policisë kundër tyre, kundër shtetit. Prandaj çdo ankesë, çdo denoncim, po ndiqet me shumë kujdes, sepse për mua secila prej tyre është një gur në murin e madh të besimit që duhet të ringrihet për Policinë e Shtetit.

Falenderoj dhjetëra qytetarë të cilët kanë raportuar plot raste apo paraqitur ankesa për veprime të dyshuara të paligjshme apo që bien ndesh me Kodin Etik në Policinë e Shtetit. Në një kohë të shkurtër kemi, në bazë të këtyre raportimeve/ankesave, punonjës policie të arrestuar, sikurse kemi edhe të përjashtuar për shkelje të normave etike.

LEXONI GJITHASHTU:

• Zjarret në vend, Balla: Do t’i ndjek personalisht çështjet për të arrestuarit
• Lënia në burg e zjarrvënësit në Laç, Balla: Të marrin të gjithë dënimin e merituar