I gjenden 11 mijë euro në çantën e dorës, e “pëson” 39-vjeçarja në Kakavijë

Një 39-vjeçare është proceduar penalisht nga Policia Kufitare në Kakavijë pasi u kap me një sasi prej 11 150 euro të padeklaruara.

39-vjeçarja u ndalua nga policia në dalje të Republikës së Shqipërisë, pasi në çantën e dorës iu gjet shuma e eurove, të cilën nuk e kishte deklaruar përballë autoriteteve.

Policia bën me dije se në vijim të veprimeve procedurale për këtë rast, u referuan materialet në Prokurori ku nisi procedimi në gjendje të lirë për shtetasen K. Q., 39 vjeçe, banuese në Berat.

Gjithashtu u sekuestrua dhe shuma e parave të gjetura në çantën e dorës së 39-vjeçares.

“Si rezultat i angazhimit maksimal të shërbimeve të Policisë Kufitare të PKK Kakavije, në bashkëpunim me autoritetet doganore, për parandalimin dhe goditjen e krimeve kufitare, krahas punës për ofrimin e një shërbimi cilësor dhe etik, qytetarëve në hyrje/dalje, është konstatuar dhe goditur 1 rasti i mosdeklarimit të të hollave.

Në bazë të analizave të riskut, në dalje të vendit, u kalua për kontroll në vijë të dytë, shtetasja K. Q., në çantën e së cilës u gjetën 11 150 euro që kjo shtetasje po tentonte t’i nxirrte nga vendi ynë, pa i deklaruar siç e përcakton ligji.

Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme, për veprën penale “Mosdeklarimi në kufi i të hollave dhe i sendeve me vlerë”, thuhet në njoftimin e policisë.

LEXONI GJITHASHTU:

• U kap me para të padeklaruara në kufi, nis hetimi për 37-vjeçarin
• “Mbreti i kriptovalutave” dënohet me 4 muaj burgim për pasaportë false