Nis takimi Kurti-Vuçiç, Euronews Albania raporton zhvillimet nga Brukseli

Kryeministri i Kosovës, Albin Kurti, dhe presidenti i Serbisë, Aleksandër Vuçiç, kanë nisur takimin në Bruksel, i cili është i parë në kuadër të dialogut pas tensioneve në veri të Kosovës.

Gazetari Xhemajl Rexha zbuloi për Euronews Albania nga Brukseli më shumë detaje në lidhje me nisjen e takimit mes dy liderëve.

Rexha tha se Kurti dhe Vuçiç zhvilluan paraprakisht takime të ndara me ndërmjetësuesit e dialogut, shefin e politikës së jashtme të Bashkimit Evropian, Josep Borrell, dhe të dërguarin e BE-së për dialogun Kosovë-Serbi, Mirosllav Lajçak.

Ai shtoi se Vuçiç në momentin që është takuar me Borrell ka thënë që ky do të ishte një takim i vështirë.

Ndërkohë që kryeministri Kurti vetëm ka përshëndetur mediat dhe ka nxjerrë çantën e tij me materialet e punës.

“Z. Vuçiç ka folur pak në atë që e paralajmëruan dje, për të bërë dramë ka thënë që takimi do të jetë shumë i vështirë. Kjo u dëgjua nga pamjet në momentin kur po pritej nga Borrell, u dëgjua të thotë që “takimi do të jetë i vështrë”. Kryeministri Kurti nuk ka dhënë ndonjë deklaratë para takimit, në pamjet që kemi dërguar vetëm ka përshëndetur mediat me dorë në momentin që hyn tek makina e tij”- tha Rexha.

Sipas njoftimit të BE-së, temë e takimit trepalësh është zbatimi i Marrëveshjes për normalizimin e marrëdhënieve, e arritur gojarisht mes Kurtit dhe Vuçiqit në muajin shkurt.

LEXONI GJITHASHTU:

• Dialogu dhe takimi Kurti-Vuçiç, Gazetari: BE mban anë! Pse nuk sanksionohet Serbia?
• Presidentja Osmani vizitë në Bruksel për takime zyrtare në NATO