Trajneri i Polonisë zyrtarisht i shkarkuar, shkak bëhet humbja me Shqipërinë

Jo vetëm fitimi i 3 pikëve dhe afrimi më tej me Europianin e Gjermanisë, por fitorja e kuqezinjve ndaj Polonisë ka dëmtuar skuadrën kundërshtare.

Menjëherë pas disfatës në Air Albania, federata polake ka marrë vendimin, ndërsa ka bërë me dije se Fernando Santos nuk do të jetë më trajner i skuadrës. Tekniku portugez është shkarkuar, ndërsa shkak është bërë ndeshja e humbur ndaj Shqipërisë me rezultatin 2-0.

Në një njoftim në rrjetet sociale, federata polake pohon se ka shkarkuar 68-vjecarin, pas rezultateve negative në këto kualifikuese. Santos e drejtoi Poloninë në 6 përballje, ndërsa një fitore në miqësoren me Gjermaninë ktheu disi euforinë në skuadër. Rrugëtimi i Santos nisi në humbjen ndaj Çekisë, më pas për të pasuar me fitoret ndaj Shqipërisë dhe Gjermanisë, kjo e fundit miqësore. Më tej në 3 përballjet e radhës u ndëshkua nga Moldavia e Shqipëria, ndërsa arriti rezultat pozitiv vetëm ndaj Ishujve Faroe.

Në këtë situatë ende nuk është përzgjedhur trajneri i ri i kombëtares polake dhe stafi i tij. Kujtojmë se aktualisht janë thuajse jashtë Evropianit, ndërsa përballjet e radhës janë ndaj Ishujve Faroe, Moldavisë dhe në përmbyllje me Çekinë.