Akuzohet për trafik droge sintetike, djali i El Chapo deklarohet i pafajshëm

Tre ditë pas ekstradimit të tij nga Meksika, Ovidio Guzman, një nga djemtë e El Chapo, u deklarua i pafajshëm në gjykatën federale në Çikago për trafikimin e fentanilit, një drogë sintetike shumë e fuqishme.

Gjatë seancës së shkurtër nën masa të rrepta sigurie, Guzman, i veshur me një kostum burgu portokalli me pranga në duar dhe këmbë, dëgjoi aktakuzën me një përkthim në spanjisht, sipas Chicago Tribune.

Guzman, 33 vjeç, është një nga katër djemtë e El Chapos, i njohur si “Los Chapitos”, i cili trashëgoi perandorinë e biznesit të babait të tij pasi El Chapo u shpall fajtor në SHBA për vrasje dhe trafik droge në vitin 2019 dhe u dënua me burgim të përjetshëm, të cilin ai është duke shërbyer në një strukturë të sigurisë maksimale në Kolorado.

Zyrtarët amerikanë kanë njoftuar se arrestimi dhe ekstradimi i Ovidio Guzman përfaqëson një fitore të rëndësishme për administratën e presidentit Joseph Biden në fushatën për të ndaluar trafikimin dhe shpërndarjen e fentanilit vdekjeprurës përgjatë kufirit jugor të SHBA-së, raporton Reuters.

Guzman u arrestua në vitin 2019 në Culiacan, por presidenti meksikan Andres Manuel Lopez Obrador urdhëroi lirimin e tij pasi qindra anëtarë të armatosur të kartelit Sinaloa pushtuan rrugët e qytetit dhe rrethuan forcat e sigurisë në qytet.

Ai u kap sërish në janar pas një përleshjeje intensive dhe tashmë në shkurt SHBA-ja kërkoi ekstradimin e tij.

Dy nga gjashtë pikat e aktakuzës kundër Guzman Jr. mbartin një dënim të detyrueshëm të përjetshëm, raportoi “Chicago Tribune”, duke cituar burime në Zyrën e Prokurorit të SHBA.

Si pjesë e marrëveshjes së ekstradimit me autoritetet meksikane, SHBA-ja ra dakord të mos zbatonin dënimin me vdekje.

LEXONI GJITHASHTU:

• Vrasje, tortura dhe trafik kokaine, SHBA kërkon të ekstradojë djalin e El Chapo-s
• Mbretëresha e Sinaloa, ‘nusja’ e El Chapo merr kartelin pas arrestimit të ‘miut’