Blindat e policisë së Kosovës në terren, pamjet nga operacioni në Veri

Policia e Kosovës njoftoi mëngjesin e kësaj të premteje se po zhvillon bastisje në pesë lokacione në veri të vendit, lidhur me sulmin terrorist ndaj Policisë së Kosovës mëngjesin e së dielës, ku u vra polici Afrim Bunjaku.

Operacioni policor është duke u kryer nga Njësitë Speciale të policisë së Kosovës, e udhëhequr nga prokuroria në bashkërendim me KFOR dhe EULEX.

“Sot, me datën 29.09.2023 Policia e Kosovës është duke zbatuar urdhëresën e gjykatës kompetente për kontrolle, në pesë lokacione në tri komunat në veri të Kosovës. Këto operacione janë duke u zhvilluar lidhur me ngjarjet e fundit të ndodhura në fshatin Banjskë.

Operacioni policor është duke vazhduar nga njësitet relevante të Policisë së Kosovës, me prezencën në vend ngjarje të Prokurorit (të PSRK-së). Me këtë rast Policia e Kosovës njofton qytetarët se nuk kanë nevojë për ndonjë shqetësim. Këto urdhër kontrolle, janë duke u zbatuar në koordinim me EULEX dhe KFOR”, thuhet në njoftimin e Policisë.

Sipas mediave lokale Policia e Kosovës ka ushtruar kontrolle në banesën ku ka jetuar Milan Radojiçiç.

Nga pamjet e publikuara nga mediat vendasve në vendngjarje shihen tre autoblinda të policisë së Kosovës të cilët kanë bllokuar rrugën në vendin ku po kryen kontrollet.

LEXONI GJITHASHTU: 

• Propozimi për Asociacionin nga Osmani/ Rama: Hap pozitiv për Kosovën
• Rama: Për të parandaluar konfliktin, KFOR të marrë në kontroll Veriun sa më parë