‘Defender Europe 21’, Rama, Basha dhe ambasadorja Kim në zyrën e Metës 

Kryeministri Edi Rama, ambasadorja Yuri Kim dhe kryedemokrati Lulzim Basha u ulën përkrah njëri-tjetrit në zyrën e presidentit të republikës Ilir Meta, në një mbledhje të Këshillit të Sigurisë Kombëtare. Mbledhja iu dedikua stërvitjes ushtarake  “Defender Europe 21”, një nga stërvitjet më të mëdha të ushtrisë amerikane në Evropë.

E drejtuar nga Komanda Ushtarake Amerikane në Europë, kjo stërvitje, përfshin pjesëmarrjen e rreth 31 mijë trupave ushtarake, 17 mijë nga të cilat amerikane dhe 14 mijë trupa të tjera nga 26 vende aleate.

Ndërkohë, në Shqipëri pritet të zhvillojnë stërvitje ushtarake 6 mijë trupa amerikane dhe 1 mjete ushtarake, pjesë të aleancës së NATO-s.

Ajo do të zhvillohet në bazat kryesore ushtarake të vendit tonë gjatë muajit maj të këtij viti. Për të parë nga afër përgatitjet për këtë stërvitje, vendin tonë po e viziton zëvendëskomandanti i Ushtrisë amerikane në Evropë dhe Afrikë, gjeneralmajor Joseph F. Jarrard, i cili u prit në një takim nga ministri i Mbrojtjes Niko Peleshi. Ky i fundit e konsideroi këtë stërvitje “jo vetëm një mundësi e rrallë për sa i përket sfidës profesionale, por mbi të gjitha, një akt besimi dhe vlerësimi për vendin tonë”.