Franca mobilizon 7000 trupa dhe shkon në gatishmëri të lartë pas sulmit në shkollë

Franca po mobilizon 7.000 ushtarë dhe po rrit statusin e saj të gatishmërisë në nivelin e “sulmit emergjent” pas vdekjes së një mësuesi në qytetin verilindor të Arras, i vrarë me thikë të premten nga një ish-student me një histori të radikalizimit islamik.

Presidenti Emmanuel Macron e mori vendimin pasi thirri një mbledhje urgjente të kabinetit të tij të sigurisë të premten mbrëma.

Macron e ka përshkruar sulmin me thikë, i cili la të plagosur rëndë dy anëtarë të tjerë të stafit të shkollës, si “terrorizëm islamik”.

Ai urdhëroi “deri në 7,000 ushtarë nga forca Sentinelle, të cilët do të vendosen nga tani deri të hënën në mbrëmje dhe deri në njoftimin e mëtejshëm”, tha Pallati Elysée të shtunën në mëngjes.

Autoritetet franceze kanë hapur hetime kundër terrorizmit pas sulmit në Arras.

Policia lokale thotë se një burrë i armatosur me thikë vrau një mësues dhe la të plagosur dy persona të tjerë në një shkollë të mesme në qytetin me pothuajse 41,000 banorë të premten në mëngjes. Sulmuesi është arrestuar në vendngjarje.

Incidenti ndodhi në shkollën e mesme Gambetta, e cila ndodhet në qendër të qytetit, dhe policia thotë se sulmuesi bërtiti “Allah Akbar” – “Zoti është i madh” në arabisht.

Ai është identifikuar si 18-vjeçari Mohammed Mogouchkov, një ish-nxënës në shkollën me origjinë çeçene, i cili ishte subjekt i “monitorimit aktiv” nga Drejtoria e Përgjithshme e Sigurisë së Brendshme të Francës DGSI.

LEXONI GJITHASHTU:

• Ngacmoi seksualisht turisten franceze, arrestohet taksisti në Tiranë
• Të paktën 100 akte antisemitike të kryera në Francë që nga sulmi në Izrael