Malltezi dhe Bektashi mbërrijnë në SPAK, Berisha ende në konferencë

Jamarbër Malltezi dhe Fatmir Bektashi kanë mbërritur mesditën e së hënës në SPAK, ku pritet të bëher rivlerësimi i masës së sigurisë ndaj tyre.

Në ambientet e SPAK kanë hyrë më herët Genc Gjokutaj, avokati i Sali Berishës dhe Antoneta Sevdari avokatja e Malltezit.

Ndërkohë ish-kryeministri Sali Berisha prej më shumë se një ore vijon konferencën për shtyp, ku po analizon me detaje dosjen 200 faqëshe të SPAK ndaj tij dhe dhëndrit të tij lidhur me privatizimin e ish-kompleksit sportiv Partizani.

Mbrëmjen e të shtunës u arrestua në aeroportin e Rinasit Jamarbër Malltezi, dhëndri i ish-kryeministrit Sali Berisha. Arrestimi u bë me urdhër të SPAK, pas kallëzimit të bërë në vitin 2020 nga ministri i Brendshëm Taulant Balla lidhur me privatizimin e ish klubit sportiv “Partizani”.

Në pranga u vu edhe Fatmir Bektashi, ortak me Malltezin dhe ndërtues i kullave ne ish-kompleksin Partizani. Ndërkohë, Gjykata e Posaçme e Shkallës së Parë për Korrupsionin dhe Krimin e Organizuar, ka vendosur masë detyrim paraqitje dhe ndalim të daljes jashtë shtetit edhe, për ish-kryeministrin Sali Berisha me akuzën e korrupsionit pasiv kryer në bashkëpunim.

LEXONI GJITHASHTU:

• “SPAK e Rama po fshehin dokumentet”, Berisha: “Partizani” kishte humbur funksionin
• Avokati Beqiri: Çfarë ndodh nëse Berisha refuzon të paraqitet në gjykatë