Shpërthim me eksploziv në Kamëz, lënda plasëse në automjetin e Gjon Menës, i dënuar më parë

Një shpërthim me eksploziv në një makinë është regjistruar këtë të martë në zonën e Kamzës, ku për pasojë është plagosur drejtuesi i mjetit, i identifikuar si Gjon Mena.

Ky i fundit, ka mbetur i lënduar në këmbë nga shpërthimi, por pa rrezik për jetën. Ngjarja është regjistruar paraditen e sotme, kur 35-vjeçari është afruar tek makina e tij e parkuar dhe në momentin që ka shtypur pultin për ta hapur, lënda plasëse ka shpërthyer.

Sipas burimeve nga grupi hetimor, sasia me eksploziv ishte vendosur në pjesën e sediljes së shoferit.

Euronews Albania ka mësuar se Gjon Mena është një emër i njohur për policinë, pasi më herët ai ka qenë i dënuar në Itali dhe Francë për vjedhje me dhunë e armë.

Ndërkaq, për identifikimin e autorëve policia ka sekuestruar kamerat e sigurisë në zonë, ndërkohë që ka marrë në pyetje disa dëshmitarë.