117-vjeçarja mposht COVID-in, gruaja më e moshuar në Evropë, gati për të festuar ditëlindjen

Personi më i moshuar në Evropë, murgesha franceze Andre, i ka mbijetuar COVID-19 dhe do të festojë këtë javë 117-vjetorin e saj.

Lucile Randon, që mban emrin e motër Andre që kur u bashkua me urdhrin e bamirësisë katolike në vitin 1944, rezultoi pozitive me coronavirus në shtëpinë e saj në Toulon, në jug të Francës, më 16 janar. Ajo u mbajt e izoluar nga banorët e tjerë, por nuk shfaqi simptoma.

E pyetur nëse kishte frikë nga COVID, motër Andre u shpreh:

“Jo, nuk kisha frikë, sepse nuk kisha frikë të vdisja. Jam e lumtur që jam me ju, por do të doja të isha diku tjetër me vëllain tim të madh dhe me prindërit e mi”.

Motër Andre, që është e verbër, por e gjallëruar, do të festojë ditëlindjen e saj me një grup të vogël fqinjësh, për shkak të rrezikut të infeksionit nga COVID.

E lindur më 11 shkurt të vitit 1904, ajo është personi i dytë më jetëgjatë në botë. E para është japonezja Kane Tanaka, që mbushi 118 vjeç më 2 janar.