Vetëvendosje thirrje mbështetësve që të mos festojnë në ambiente publike për shkak të COVID-19

Albulena Haxhiu nga selia e Vetëvendosjes iu bëri thirrje mbështetësve të kësaj partie që të shmangin grumbullimet për shkak të masave kundër COVID-19. 

Teksa i thoshte këto fjalë, jashtë selisë së Vetëvendosjes në Prishtinë dëgjoheshin britmat “Albin Kurti” nga mbështetës të partisë, që parashikohet si fituesja e këtyre zgjedhjeve të parakohshme në Kosovë.

Zonja Haxhiu theksoi se kjo thirrje vjen për shkak të situatë së pandemisë dhe motit të keq që ka përfshirë vendin.  

“I ftoj qytetarët e Kosovës që festën e tyre dhe festën tonë ta bëjmë secili pranë familjes në shtëpitë tona. Është e rëndësishme që të mos tubohemi në sheshe dhe rrugë për shkak të pandemisë dhe për shkak të temperaturave të ulëta dhe rrugët e pa-pastruara mund të bëhen shkak për probleme me shëndetin individual dhe atë publik”, u shpreh ajo.

Haxhiu tha më tej se gjatë procesit të numërimit, vota duhet të jetë e paprekshme dhe se procesi duhet të jetë i drejtë.

Vetëvendosje zgjodhi të mos prononcohet lidhur me exit poll-et që e shpallin partinë fituese duke thënë se po pret përfundimin e numërimit.

Lexoni gjithashtu:

LIVE l Numërohen 33% e votave, LVV thellon diferencën

Exit Poll-et mbi zgjedhjet, Hajrullahu: VV-ja ka marrë vota nga partitë e tjera