Reagimi i Brukselit për zgjedhjet në Kosovë, Borrel dhe Varhelyi: Presim angazhim për dialogun me Serbinë

Dy komisionerët kryesorë të BE-së, për politikën e jashtme Josep Borrel dhe Komisioneri për Zgjerimin Oliver Varhelyi kanë dalë me deklaratë të përbashkët në lidhje me rezultatin e zgjedhjeve në Kosovë. Sipas deklaratës zyrtare, ata janë të pritje të certifikimit të rezultatit final të zgjedhjeve për krijimin e parlamentit dhe qeverisë së re, por edhe zgjedhjen e një presidenti të ri.

Borrel dhe Varhelyi kanë siguruar që Misioni i Ekspertëve Elektoralë të BE-së do të vazhdojë që të mbetet në Kosovë në mënyrë që të ndjekë dhe procedurat post-elektorale si dhe të japë rekomandime.

Deklarata përmend dhe normalizimin e marrëdhënieve me Serbinë, dhe BE pret që autoritetet e reja në Prishtinë të angazhohen në mënyrë konstruktive me qëllim që të vazhdojnë takimet e ndërmjetësuara nga BE në lidhje me dialogun si dhe të shikojnë mundësitë përpara tyre për të arritur një marrëveshje të përgjithshme.

I deleguari i veçantë i BE-së për dialogun midis Prishtinës dhe Beogradit Miroslav Lajçak ka përshëndetur dhe shpërndarë në Twitter deklaratën e përbashkët të komisionereve evropiane

‘Zgjedhjet e djeshme në Kosovë treguan maturitet të institucioneve të saj, të gjithë aktorëve dhe partive politike. Qytetarët e ngritën zërin e tyre në mënyrë që ai të dëgjohet dhe po pres që të punoj me qeverinë e re për vazhdimin e Dialogut’, shkroi Lajçak.

Komisionerët evropianë theksuan që BE do të vazhdojë të mbetet e angazhuar në Kosovë, në mënyrë që ajo të arrijë një progres të dukshëm në rrugën e saj evropiane. Progresi, sipas tyre, do të thotë progres në Marrëveshjen e Stabilizim-Asociimit, në Axhendën për Reformën Evropiane si dhe në bashkëpunimin rajonal.