Hungaria bëhet i pari shtet i BE-së që përdor vaksinën kineze anti-COVID

Hungaria nisi të mërkurën shpërndarjen e vaksinave anti-COVID të prodhuara nga kompania kineze Sinopharm. Në këtë mënyrë Hungaria bëhet i pari vend i Bashkimit Evropian që përfshin në programin e vaksinimit vaksinë nga Kina.

Nisjen e përdorimit të vaksinës së SInopharm e njoftoi kryeministri Viktor Orban, përmes një postimi në Facebook.

Hungaria miratoi më 29 janar përdorimin e vaksinës kineze për situata të emergjencës. Më pas qeveria e Orban nisi diskutimet për të marrë 5 milionë doza të vaksinave Sinopharm, të mjaftueshme për të mbuluar 2.5 milionë persona të vendit që numëron rreth 10 milionë banorë.

Vaksina e Sinopharm nuk është miratuar ende nga Agjencia Evropiane e Barnave.

Vendimi i qeverisë vjen si përpjekje për të parandaluar një valë të tretë të infeksionit teksa aktualisht po përjetohet viti i dytë i pandemisë.

Qeveria e Orban ka vendosur që t’u japë dritën jeshile, pa ndonjë rishikim shtesë, çdo lloj vaksine që është përdorur në të paktën 1 milionë persona deri më tani në rang botëror.

Vetë Orban ka qenë kritik ndaj qasjes së përdorur nga BE-ja për programin e vaksinimit duke u shprehur se “nuk mund t’i lërë hungarezët të vdesin thjesht sepse Brukseli lëviz ngadalë në marrjen e vaksinave”.

Lexoni gjithashtu:

COVID-19 në Evropë, presion që të hapen kufijtë, Holanda rihap shkollat