Hetimi për trafik organesh, ministrja Gjonaj-homologut spanjoll: Ndiqeni me prioritet rastin Saimir Sula

Ministrja e Drejtësisë, Etilda Gjonaj, gjatë një takimi online me homologun e saj spanjoll, ka kërkuar ndjekjen me prioritet të letër-porosisë drejtuar autoriteteve spanjolle për rastin e Saimir Sulës, të cilit dyshohet se i hoqën zemrën në një spital në Barcelonë.

Letër-porosia e autoriteteve shqiptare është nisur më datën 1 shkurt, por sot ka mbërritur në Spanjë.

Në përmbajtjen e saj, Ministria e Drejtësisë ka listuar disa kërkesa, mes të cilave dhe gjetjen e shkakut pse mungon zemra e Saimir Sulës.

Ndërkaq, Ministri i Drejtësisë i Spanjës garantoi për mbështetjen e tij në këtë kërkesë që lidhet me një ngjarje me ndjeshmëri të madhe humane dhe publike.

Vizita në Spitalin “Hospital Del Mar” për t’u testuar nëse ishte mbartës ose jo i COVID-19 rezultoi fatale për 32-vjeçarin Saimir Sula që prej pak muajsh kishte shkuar tek e motra, e cila prej vitesh jetonte në Spanjë.

Ky i fundit ka humbur jetën në maj të 2020-ës, ndërkohë që prej 9 tetorit një hetim i paprecedent po kryhet nga Prokuroria e Tiranës lidhur me një trafikim të mundshëm organesh. Regjistrimi i kësaj çështje ka ardhur pas kallëzimit të së motrës së 32-vjeçarit për mjekim të pakujdesshëm nga mjekët spanjoll.

Autopsia e dytë e bërë pas tërheqjes së trupit të pajetë të Saimir Sulës në Shqipëri nxori në pah një fakt tronditës për vetë hetuesit dhe familjarët e të ndjerit ku rezultoi se viktimës i mungonte zemra.

Lexoni gjithashtu:

32-vjeçarit i mungon zemra, Prokuroria e Tiranës nis hetime për ngjarjen në Spanjë