Tri besime në një ndërtesë, Gjermania nis punimet për qendrën ndërfetare të Berlinit

Tri besime fetare nën një çati. Është kjo ideja e një qendre ndërfetare të projektuar në Berlin. E njohur si Shtëpia e Përbashkët, ajo do t’i shërbejë komunitetit të krishterë, atij hebre dhe islamik në kryeqytetin gjerman.

Godina, që do të kushtojë 47 milionë euro, do të ngrihet në pjesën lindore të Berlinit, e njohur për laicizmin e saj.

“Ideja erdhi nga tre komunitetet lokale dhe ata hodhën rrënjët e këtij projekti. Është një godinë e re, me arkitekturë të papërdorur më parë, jo për të bashkuar fetë, por për të shërbyer si një shtëpi ku traditat fetare të jetojnë në harmoni, duke u kujdesur për identitetin përkatës por edhe atë të tjetrit”, shprehet Roland Stolte, ideator i projektit.

Objekti i kultit do të përmbajë një kishë, një sinagogë dhe një xhami, të lidhura me një dhomë të përbashkët në qendër të saj. Ndërtimi pritet të zgjasë 4 vjet.