“Fly Ernest” pezulloi fluturimet, qytetarët e dëmtuar nuk dinë ku të gjejnë zgjidhje

Kompania ajrore private italiane e fluturimeve me kosto të ulet “Fly Ernest”, e cila realizonte fluturime në shumë qytete të Italisë nga Rinasi, njoftoi se nga 11 janari nuk do të fluturojë më, për shkak të një pezullimi të aktivitetit nga autoritetet italiane.

Kompania nuk tregoi në njoftimin e saj arsyen e pezullimit, por sipas ekspertëve,“Fly Ernest” nuk ka plotësuar kuorumin e 20% të planit të biznesit për fluturimet.

Kompania në njoftimin e saj ka lënë pikat e kontaktit për të rimbursuar biletat e shitura, por nuk dihet nëse qytetarët tani i kanë marrë që të gjithë mbrapsht paratë.

Euronews Albania u interesua pranë Drejtorisë së Aviacionit Civil të Shqipërisë dhe mori përgjigje se në rast se nuk janë kthyer paratë, qytetarët duhet të hedhin në gjyq kompaninë në Itali.

Ndoshta, nëse janë shumë qytetarë të prekur, Avokati i Popullit mund të ndihmojë qytetarët në nevojë të hapin një gjyq të përbashkët ndaj kompanisë së pezulluar.