577 vjetori i Besëlidhjes, personalitete nga trevat shqiptare mblidhen sot në Lezhë

Sot shënohen 577 vjet nga mbledhja e Kuvendit të Princave Shqiptarë në të ashtuquajturën Besëlidhja e Lezhës. 

Besëlidhja u mbajt më 2 mars 1444, në katedralen e Shën Nikollës në Lezhë, me pjesëmarrjen e gjithë princërve të krahinave arbërore.

Kjo Besëlidhje mori vendime të rëndësishme si: krijimi i një Besëlidhje Arbërore me në krye Skënderbeun, formimi i një ushtrie të përbashkët të komanduar nga Skënderbeu si kapiten i përgjithshëm dhe krijimi i një arke të përbashkët për të përballuar shpenzimet e luftës.

Për më shumë vite e shekuj, por edhe sot ky Kuvend merret si shembull i krijimit dhe mbajtjeve të kuvendeve me karakteristika shqiptare demokratike, në të cilat vendos shumica e pjesëmarrësve.

Gazetari i Euronews Albania, Renaldo Salianji gjendej në Lezhë aty ku dhe do të kremtohet kjo datë e shënuar nga personalitete të shumtë nga Shqipëria, Kosova, Lugina e Preshevës e Maqedonia e Veriut.

Ai tha se për të shmangur grumbullimet e shumta në respekt të masave anti-COVID nuk ka pasur një lajmërim zyrtar për mbledhjen e personaliteteve nga trevat shqiptare në shenjë simbolike në datën e Besëlidhjes së Lezhës.

Sa i takon pjesëmarrjes së Albin Kurtit, duhet thënë se është një vizitë pa protokoll duke qenë se kreu i Lëvizjes Vetëvendosje ende nuk e ka marrë detyrën e kryeministrit, përndryshe vizitën e parë zyrtare duhet ta bëjë në Shqipëri, siç tashmë është bërë traditë.

Lexoni gjithashtu:

Ndahet nga jeta Agim Krajka, kompozitori i njohur la pas një trashëgimi të çmuar

 Dita e verës në Korçë, ndezja e zjarreve simbolizon ikjen e dimrit dhe ardhjen e pranverës

Votimi dhe numërimi elektronik, KQZ vendos sot zonën në Tiranë ku do të bëhet procesi pilot