Rriten rastet e infektimeve në Kosovë, 8 persona humbin jetën në 24 orët e fundit nga COVID-19

Gjatë 24 orëve të fundit në Kosovë, 8 persona kanë humbur betejën me coronavirusin, ndërsa 488 të tjerë kanë rezultuar pozitivë me COVID-19.

Personat, të cilët kanë ndërruar jetën për shkak të COVID-19, janë përkatësisht nga mosha 37 vjeç deri në moshën 87 vjeç. Numri total i pacientëve, të cilët kanë humbur jetën nga coronavirusit në Kosovë ka shkuar në 1.616 viktima.

Autoritetet shëndetësore raportojnë se gjatë këtyre orëve në Laboratorin e Mikrobiologjisë Molekulare në IKShPK-së dhe laboratorët private me metodën RT-PCR, janë kryer 2886 testime të reja.

Gjatë 24 orëve të fundit, janë shëruar 270 pacientë, kurse numri i rasteve aktive ka shkuar në 8.236.

Autoritetet shëndetësore në Kosovë theksojnë se numri i rasteve pozitive dhe vdekjeve nga COVID-19 vazhdon të jetë i lartë si pasojë e drejtpërdrejtë e neglizhimit të masave kufizuese .

IKSHPK përsërit thirrjen për zbatimin e të gjitha masave të përgjithshme dhe specifike për mbrojtjen nga pandemia COVID-19.