Ndalimi i tubimeve politike, Gjykata Kushtetuese shqyrton padinë e PR: Preken partitë opozitare

Gjykata Kushtetuese mori në shqyrtim padinë e Partisë Republikane, e cila ankimoi vendimin e komitetit teknik për ndalimin e tubimeve politike. Sipas republikanëve, ky vendim ndikon në mënyrë të drejtpërdrejtë tek partitë opozitare, të angazhuara në fushatën zgjedhore, për zgjedhjet e përgjithshme parlamentare të 25 prillit.

Në seancën e zhvilluar këtë të martë, i pranishëm ishte dhe kreu i kësaj partie, Fatmir Mediu, i cili për mediat u shpreh se mazhoranca po tenton të fusë opozitën në karantinë.

Ndërkaq, lidhur me këtë padi, Gjykata Kushtetuese u tërhoq për të shqyrtuar këtë kërkesë të Partisë Republikane, ndonëse ende nuk ka një datë se kur do të ketë një vendim për këtë çështje.

Përfaqësuesi ligjor i Partisë Republikane, Dardan Mustafaj seancën e sotme e cilësoi të rëndësishme pasi sipas tij u dëshmua se Gjykata Kushtetuese është funksionale.

“Kjo seancë e sotme ishte e rëndësishme, sepse tregoi se Gjykata Kushtetuese funksionon dhe Gjykata Kushtetuese kishte interesimin për të dëgjuar palët dhe e vlerësoj edhe në kushtet e pandemisë”, theksoi ai.

I pranishëm në Euronews Albania, z. Mustafaj nënvizoi se në seancë ku të pranishme ishin të gjitha palët u diskutuan të gjitha çështjet teknike, ndërsa shtoi se Gjykata Kushtetuese pritet të dalë me një vendim brenda 30 ditësh.

“Ishte një seancë e vetme dhe u shkua në thellësi të çështjeve dhe u ezauruan të gjitha aspektet teknike të saj”, shtoi ai.