Kamatëvonesat e energjisë, gjatë 2020 shqiptarët paguan rreth 7.2 milionë euro më shumë

Gjatë vitit 2020 shqiptarët paguan rreth 7.2 milionë euro më shumë si pasojë e vonesave në pagimin e faturës së energjisë elektrike.

Të dhënat zyrtare nga Operatori i Shpërndarjes së Energjisë Elektrike tregojnë se gjatë vitit 2020 në total ishin 4.8 milionë fatura që kishin vonesa në pagesë.

Kjo duket se lidhet edhe me situatën e pandemisë kur nga mesi i marsit e deri në fund të prillit Shqipëria u vendos nën karantinë për të nisur më pas me masa lehtësuese nga prilli e në vazhdim.

Kjo u lidh drejtpërdrejt edhe me  pamundësinë në disa raste të familjeve për të përmbushur nevojat e tyre financiare në kushtet kur një pjesë humbën edhe vendin e punës.

Çdo konsumator ka të drejtë që faturën e muajit korrent ta paguajë pa penalitete deri në ditën e fundit të muajit pasardhës.

Pas kësaj automatikisht përllogaritet kamatëvonesa e cila mund të arrijë në maksimalisht deri në 50 për qind të vlerës së faturës.