Padia e Ramës, Basha i del në krah Ramush Haradinajt: Perversitet i shëmtuar antikombëtar

Kryedemokrati Lulzim Basha i ka dalë në krah kryeministrit në detyrë të Kosovës, Ramush Haradinaj pas padisë që kryeministri shqiptar, Edi Rama bëri në drejtim të tij me akuzën e shpifjes.

Përmes një statusi të postuar në faqen e vet zyrtare në Facebook, kreu i demokratëve e cilëson padinë e Ramës ndaj Haradinajt një perversitet të shëmtuar antikombëtar.

“Është turp i pakapërdishëm që Ramush Haradinaj, pas gjakut të tij dhe familjes së tij për çlirimin e Kosovës, pas betejave me akuzat e montuara të Beogradit, të përballet me pasojat e degjenerimit dhe vasalitetit të Edi Ramës. Ky akt i ulët që na turpëron të gjithëve meriton refuzimin dhe revoltën legjitime ndaj një kryeministri të dështuar fund e krye dhe ndaj falimentimit të tij politik dhe moral para Shqipërisë dhe mbarë kombit shqiptar”, – shkruan kryedemokrati në Facebook.

Me pretendimet se Haradinaj ka shpifur me deklarimet e tij ndaj kryeministrit shqiptar, Edi Rama kërkon kompensim të dëmit. Padia e cila përmban mbi 30 faqe, pretendon se Haradinaj ka shpifur ndaj Ramës, për deklaratat që ai ka dhënë në lidhje me temën e shkëmbimit të territoreve.