Bonusi i bebes, rregulla të reja/ Kusht qëndrimi 6 muaj në Shqipëri

Qeveria shqiptare ka miratuar tashmë rregullat e reja për përfituesit e bonusit të bebes. Me qëllim eleminimin nga marrja e këtij shpërblimi ata që nuk jetojnë në Shqipëri,  këshilli I ministrave ka bërë ndryshimin në vendim , ku parashtrohet si kusht, qëndrimi në vendin tonë për 180 ditë në vitin paraardhës për prindërit e foshnjave të sapolindura. Këto të dhëna do të merren nga sistemi TIMS.

Një tjetër element që shtohet është përfitimi i këtij bonusi nga ata të huaj që janë vendosur në Shqipëri si azilkërkues apo refugjatë të cilët vendosin që shtetësia e fëmijës së tyre të jetë shqiptare.

Në vendim thuhet se  përfitues të bonusit janë “prindërit me shtetësi tjetër, të cilët janë rezidentë të ligjshëm në Republikën e Shqipërisë, të cilëve nga shteti shqiptar u është dhënë statusi i refugjatit, i mbrojtjes plotësuese ose i azilkërkuesit dhe vendosin t’i japin foshnjës shtetësi shqiptare, sipas ligjit për shtetësinë shqiptare, dhe e regjistrojnë si shtetas shqiptar në Regjistrin Kombëtar të Gjendjes Civile”.

Në shtator të këtij viti vendimi që lidhej me bonusin e bebeve u ndryshua duke synuar që përfitimet të jenë për shtetasit që jetojnë brenda vendit pasi ndër vite edhe emigrantët shqiptarë që jetojnë jashtë kishin përfituar nga kjo hapësirë ligjore. Për qeverinë kjo përbënte përfitim të dyfishtë pasi ata përfitojnë nga skemat në vendet ku janë vendosur.

Qeveria miratoi bonusin e bebeve që ka një përfitim financiar prej 40 mijë lekësh për fëmijën e parë, 80 mijë lekë për të dytin dhe 120 mijë lekë për të tretin dhe foshnjat e tjera në vijim si një politikë për rritjen e lindshmërisë por deri më sot nuk ka një vlerësim mbi efektivitetin e saj.

LEXONI GJITHASHTU: 

• Makina përplas një person në qendër të Tiranës, shoqërohet drejtuesi i mjetit
• “Gjakderdhje në Kosovë dhe Bosnjë?” Analisti: Ja si do të nisë gjithçka