Temperatura të ulëta në Korçë, reshje shiu në Shkodër dhe Gjirokastër

Temperaturat e ulëta kanë përfshirë gjithë vendin. Në Korçë dhe fshatrat e saj, reshjet e dëborës kanë mbuluar rrugët. E rëndë paraqitet situata në akset e rrugëve të zonave të thella malore.

E ndërkohë janë hasur probleme sa i takon energjisë elektrike. 150 familje të fshatrave të njësisë administrative Lekas janë pa energji.

Pa energji elektrike janë edhe 169 familje në 5 fshatra të njësisë administrative Dardhas në Bashkine e Pogradecit dhe 170 familje po me të njëjtin problem, në fshatra të bashkisë së Kolonjës.

Shkodra prej dy ditësh është përfshirë nga reshjet e shiut. Ndërkohë në Qafën e Thorës, segmenti rrugor është i mbuluar nga dëbora.

ARRSH i ka bërë thirrje kujtdo që të tregohen të kujdesshëm, teksa në terren grupet e punës janë duke bërë pastrimin nga rënia e gurëve apo inerteve në trup të rrugës.

Sipas ARRSH-së, në akset rrugore Korçë-Dardhë, në Tamarë-Vermosh, në Qafë Thore-Bogë, në Valbonë nga km 20 ka pasur reshje dëbore me intensitet mesatar.

LEXONI GJITHASHTU:

• Kroacia jep alarmin e kuq për motin, priten stuhi deri në 200 km/h
• Moti i keq shkakton probleme në juglindje, dhjetëra familje pa energji elektrike