Rikthehen reshjet e borës në Juglindje, vështirësi në qarkullim

Reshjet e borës janë rikthyer në zonat malore në juglindje të vendit.

Paraditen e sotme kanë qenë më të dendura në zonat e njësive administrative Dardhas, Velcan e Proptisht në Bashkinë e Pogradecit.

Burime zyrtare pranë njësive administrative bëjnë të ditur se trashësia e dëborës ka shkuar nga 5-7 cm duke sjellë edhe vështirësi në qarkullimin e mjeteve, kryesisht në fshatrat e thella të këtyre njësive administrative

Vështirësi në qarkullim ka edhe në fshatrat e tjera të zonave malore të qarkut të Korçës.

Reshje ka pasur edhe në Qafë Thanë e Qafë Plloçë duke sjellë probleme në qarkullim në momentet e para.

I menjëhershëm ka qenë reagimi i firmave kontraktore duke sjellë edhe normalizimin e qarkullimit por policia rrugore u bën thirrje drejtuesve të mjeteve të bëjnë kujdes me shpejtësinë në gjithë akset nacionale dhe të kenë mjetet e tyre të pajisura me goma dimërore.

Me goma dimërore qarkullimi bëhet edhe në aksin rrugor Boboshticë – Dardhë e Voskop – Voskopojë

Nga ana e OSSHE bëhet me dije se deri tani nuk ka pasur probleme për sa i përket furnizimit me energji elektrike.