Kosova me qeveri të re, Olluri: Kurtit i leverdis Vjosa Osmani presidente për ta lënë jashtë politikës aktive

Analisti politik në Kosovë, Parim Olluri teksa komentoi për Euroneës Albania qeverinë re ‘Kurti 2’, tha se nuk ka asnjë surprizë për emrin e kryeministrit, për të cilin u nominua vetë Kurti me gjithë rrezikun e rrëzimit në Kushtetuese për shkak të dënimit të mëparshëm dhe emrit të kryeparlamentarit Glauk Konjufca.

Por, numri i vogël i votave për këtë të fundit sipas tij, është sinjal nga partitë e vogla se nuk do të votojnë presidentin.

Z. Olluri e sheh angazhimin maksimal të Albin Kurtit për ta bërë Vjosa Osmanin presidente me dëshirën e kreut të VV për ta lënë Osmanin jashtë politikës aktive duke e parë si konkurrente të fortë.

“Ka një dëshirë të VV që Osmani të jetë presidente, sepse VV i leverdis zbehja e figurës politike të Vjosa Osmanit, duke e bërë presidente dhe duke e zhvendosur në politikë jo aktive. Kurti i trembet rritjes politike të saj. Është dëshirë e tij për ta lënë jashtë politikës aktive. Më shumë është angazhuar Kurti që e trumbeton atë si presidente sesa vetë Osmani”, u shpreh analisti.