Falsifikoi e tjetërsoi pronat në Lezhë, ekstradohet nga Italia i dënuari

Paulin Simoni, 39-vjeç, i shpallur në kërkim ndërkombëtar nga autoritetet ligjzbatuese është ekstraduar këtë të mërkurë nga Italia në Shqipëri.

39-vjeçari rezulton i dënuar me 3 vjet e 8 muaj burgim, nga Apeli i Gjykatës së Posaçme kundër Krimit të Organizuar dhe Korrupsionit.

Ai është dënuar nga gjykata, pasi në bashkëpunim me shtetas të tjerë, ka kryer veprime të kundërligjshme duke falsifikuar dokumentet e pronës dhe formularët e pronësisë, me qëllim tjetërsimin e pronave në bregdetin e Lezhës.

Gjithashtu policia bën me dije se edhe një tjetër person i shpallur në kërkim ndërkombëtar është ekstraduar nga Shqipëria drejt Gjermanisë.

Policia bën me dije se si rezultat i bashkëpunimit me Interpol Wiesbaden, është ekstraduar drejt Gjermanisë, shtetasi serb I. B., 50 vjeç.

Ky shtetas ishte shpallur ne kerkim ndërkombëtar nga Interpol Wiesbaden, pasi Gjykata Rajone e Ravensburg, me vendimin e datës 17.08.2023, ka nxjerrë urdhër arresti ndërkombëtar për veprat penale “Falsifikimi i dokumenteve” dhe “Përvetësimi i sendeve të vjedhura”, kryer më shumë se një herë, në formën e grupit kriminal, parashikuar nga Kodi Penal i Gjermanisë.