Sveçla për mbylljen e 3 komunave paralele në Kosovë: Koha e paligjshmërisë përfundoi

Ministri i Punëve të Brendshme të Kosovës, Xhelal Sveçla, ka njoftuar sot për mbylljen e tri komunave paralele në rajonin e Dukagjinit.

Në llogarinë e tij në Facebook, ai ka shkruar se koha e paligjshmërisë ka përfunduar dhe institucioni i vetëm i Serbisë brenda Kosovës do të jetë ambasada e saj në Prishtinë, raporton Klan Kosova.

“Pas një koordinimi të ngushtë mes Policisë së Kosovës, Prokurorisë dhe Agjencisë së Kosovës për Inteligjencë, me urdhër të Prokurorisë, Policia sot ka zhvilluar një aksion në mbylljen e strukturave paralele të Serbisë që kanë operuar brenda Republikës së Kosovës.

Me këtë rast, në Gorazhdec është mbyllur komuna ilegale e Pejës, në Osojan komuna paralele e Istogut dhe në Videjë komuna paralele e Klinës.

Mbesim të përkushtuar në fuqizim institucioneve të Republikës së Kosovës, në respektim të plotë të Kushtetutës sonë dhe unitaritetit të saj.

Koha e paligjshmërisë ka përfunduar dhe institucioni i vetëm i Serbisë brenda Republikës së Kosovës do të jetë ambasada e saj në Prishtinë”,-shkruan Sveçla në Facebook.

LEXONI GJITHASHTU:

• Zbardhet takimi Balla-Zveçla, në qendër të diskutimeve vonesat në kufi
• Kosova shpall organizatat terroriste, Zveçla: Kemi prova që kanë kryer sulme në Veri