Çelet zyrtarisht fushata, Çipa: Zgjedhjet duhet të kthehejnë stabilitetin institucional

Për gazetarin Aleksandër Çipa zgjedhjet e 25 prillit pritet të rikthejë normalitetin institucional dhe stabilitetin politik të vendit, aspekte që sipas tij kanë rëndësi për synimet kryesore të vendit.

“është një proces zgjedhor që fatkeqësisht vendoset në një kontekst të një vakumi të madh institucional, një periudhë gati dyvjeçare e qëndrimit të opozitës jashtë institucioneve të vendit solli traumën e madhe të shembjes së pluralizmit dhe funksionalitetit të demokracisë institucionale dhe këto zgjedhje fatkeqësisht e kanë edhe këtë misionarizëm, rikthimin e normalitetit institucional dhe të vijojnë maturitetin politik të shoqërisë,” – tha Çipa.

Gjatë intervistës me gazetaren Esmeralda Mulaj, Çipa komentoi për Euronews Albania mënyrën se si dy partitë kryesore çelën fushatën elektorale të 25 prillit në Tiranë. Ai tha se PD dhe PS kishin kontrast të dukshëm qoftë në organizim po ashtu edhe në retorikën e fjalimeve që u mbajtën.

Organizimin e PD-së Çipa e cilësoi të stilit amerikan të përqendruar te entuziazmi dhe elektorati. Për këtë ai fiksoi si detaje përzgjedhjen e një shkrimtareje në prezantimin e udhëheqësit, ngjashëm me Joe Biden dhe tiparet festive të eventit.

Ndërsa organizimin e PS-së Çipa e përshkroi të përqendruar te forma dhe qetësia, si një tregues kryesisht për elektoratin e saj.

Duke u përqendruar te ligjërimi politik mes të dyja palëve, Çipa tha se PD u përqendrua më tepër te elektorati i pavendosur për t’i përfshirë që në nisje të fushatës me diskutime rreth programit dhe mënyrës se si duhet qeverisur, ndërsa PS u përqendrua te kundërshtari politik.

Për Çipën qetësia dhe estetika e zgjedhur nga Rama në çeljen e fushatës ishte një zgjedhje për të ndjekur prirjen e shoqërisë që nuk i preferon më qasjet agresive me gjuhë fyese dhe urrejtjeje në politikë. Ai tha se në dukje “konflikti politik” është “pas porte” dhe të dyja palët po përpiqen t’i shmangen së paku përplasjeve publike dhe “pistës tradicionale të konfliktit”.

Çipa përqendroi vëmendjen te fakti se në fushatë nuk është trajtuar efekti dhe trauma psikologjike që ka shkaktuar pandemia në shoqëri.

Për sa i përket deklaratave të ndërkombëtarëve për “pastrimin e politikës”, Çipa tha se tashmë po konstatohet qartë se dekriminalizimi nuk është një hap i thjeshtë.

Lexoni gjithashtu:

PS kërkon mandatin e tretë, Rama sulmon Bashën për mënyrën e nisjes së fushatës

PD kërkon rotacionin, Basha: Ndryshimi po vjen, do ta çoj Shqipërinë në BE