Vllaznia bind edhe në Kupë, shkodranët mposhtin Erzenin 6-1

Kupa e Shqipërisë ka njohur dhe dy skuadrat e tjera gjysmëfinaliste dhe ato janë Tirana dhe Vllaznia. Bardheblutë mposhtën Teutën, ndërsa në anën tjetër në Loro Boriçi, vendësit shpartalluan Erzenin në shifrat 6-1.

Një përballje e dominuar nga të besuarit e Qatip Osmanit, por me Erzenin që luajti me një lojtar më pak që prej minutës së 40, ku Atanda u ndëshkua me të kuq.

Shkodranët shënuan në pjesën e parë me Balajn dhe Malën, ndërsa në fraksionin e dytë një autogol i Stojanoviç rihapi sfidën, e duke shtuar ndeshjen e parë që u fitua nga shijakasit 2-1, bëri që të ketë 30 minuta shtesë. Në minutën e 98’ Gomes dërgoi shifrat në 3-1 e më pas Balaj shënoi të katërtin, me Gomes që realizoi dhe dy herë të tjera duke vulosur triumfin 6-1.

Në sfidën e luajtur më herët të mërkurën Tirana eliminoi Teutën. Koha e rregullt përfundoi 1-1 pas golave të Peposhit dhe Latifit. Koha shtesë nuk solli ndryshime duke bërë që të aplikoheshin 11 metërshat. Nga pika e bardhë gaboi Jonuzi për kryeqytetasit dhe Kotobelli e Jazxhi për durrsakët, duke bërë që të avancojë ekipi i Erbim Fagut. Tirana e Vllaznia i bashkohen kështu dyshes Kukësi-Egnatia në gjysmëfinale.

LEXONI GJITHASHTU:

• Klasikja e futbollit shqiptar/ Vllaznia pret në shtëpi Tiranën, pritet spektakël
• Vllaznia triumfon në klasike, shkodranët mposhtën Tiranën 3-1, Teuta bind në derbi