VIDEO| Mbi kabinën e makinës duke kryer manovra, ‘e pëson’ 20-vjeçari në Pogradec

Një 20-vjeçar në Pogradec është gjobitur me 75 mijë lekë të reja, për shkak se kreu manovra të rrezikshme dhe pengoi qarkullimin e automjeteve në një zonë të banuar.

Përmes një njoftimi, Policia bën të ditur se masa ndaj 20-vjeçarit u mor pas publikimit të një videoje në rrjetet sociale.

Nga video, i riu shihet teksa ha hipur mbi kabinën e automjetit, ndërkohë që manovrat me timonin i kryen pasagjeri.

Po ashtu, 20-vjeçarit i është hequr edhe leja e drejtimit të automjetit.

Njoftimi i Policisë:

DVP Korçë-Kreu manovra të rrezikshme dhe pengoi qarkullimin në zonë të banuar, shërbimet e Policisë Rrugore identifikojnë dhe ndëshkojnë me masë administrative 75 000 lekë, drejtuesin e automjetit, si dhe i tërheqin lejen e drejtimit.

Menjëherë pas publikimit të një video-je në portalin “JOQ”, në të cilën shfaqet një drejtues automjeti, i cili kryente manovra të rrezikshme në zonë të banuar, duke u bërë rrezik për veten dhe përdoruesit e tjerë të rrugës, shërbimet e Policisë Rrugore Korçë organizuan kontrollet me qëllim identifikimin dhe ndëshkimin e tij.

Nga verifikimet rezultoi se drejtuesi i automjetit, shtetasi M. M., 20 vjeç, banues në Pogradec, ka hipur mbi kabinën e automjetit, ka kryer manovra të rrezikshme dhe ka penguar qarkullimin, në zonë të banuar, ndërkohë që manovrat me timonin i ka kryer pasagjeri.

Për kundërvajtjet e kryera, konkretisht për shkelje të neneve 126, 139 dhe 170 të Kodit Rrugor, shtetasi M. M. u ndëshkua me masë administrative 75 000 lekë. Gjithashtu, 20-vjeçarit iu tërhoq leja e drejtimit.

Drejtoria Vendore e Policisë Korçë apelon për të gjithë përdoruesit e rrugës, që të respektojnë rregullat e qarkullimit rrugor, me qëllim mbrojtjen e jetës dhe garantimin e sigurisë rrugore.

LEXONI GJITHASHTU:

• VIDEO| Drift e manovra të rrezikshme, e ‘pëson’ drejtuesi 23 vjeçar i mjetit Jaguar
• Bënte manovra të rrezikshme në rrugë, gjobitet shoferi në Tiranë