PE padi ndaj Komisionit Europian, shkak 10.2 miliardë eurot për Hungarinë

Parlamenti Evropian ka ngritur një padi kundër Komisionit Evropian për zhbllokimin e 10.2 miliardë eurove në fondet e ngrira për Hungarinë.

Euronews shkruan se lëvizja, e parashikuar të hënën në mbrëmje, u vulos mëngjesin e së enjtes nga kryetarja e Parlamentit, Roberta Metsola, gjatë një takimi me krerët e grupeve politike. Metsola ka autoritetin përfundimtar për të nisur veprime ligjore kundër institucioneve të tjera përpara Gjykatës Evropiane të Drejtësisë.

Me padinë, rritet presioni ndaj Ursula von der Leyen ndërkohë që ajo kërkon një mandat të dytë në krye të Komisionit dhe zotohet të qëndrojë e palëkundur në sundimin e ligjit.

Zemërimi i ligjvënësve rrjedh nga vendimi i marrë nga Komisioni në dhjetor që zhbllokoi 10.2 miliardë euro nga fondet e kohezionit për Hungarinë, të cilat ky vend nuk kishte mundur t’i merrte për shkak të problemeve të vazhdueshme në sundimin e ligjit.

Ekzekutivi argumentoi se zhbllokimi ishte i justifikuar sepse Budapesti kishte miratuar në maj të vitit të kaluar një reformë për të forcuar pavarësinë e gjyqësorit dhe për të zbutur ndërhyrjen politike në gjykata, në përputhje me katër “super piketat” që kishte vendosur Brukseli.

Ligjvënësit, duke i bërë jehonë shqetësimeve të shprehura nga shoqëria civile, kundërshtuan arsyetimin dhe thanë se ky rishikim nuk ishte në lartësinë e detyrës. Ata u ankuan gjithashtu se paratë ishin dhënë një ditë përpara një samiti vendimtar të liderëve të BE-së, në të cilin kryeministri Viktor Orbán kishte kërcënuar me veto ndaj marrëveshjeve kryesore për Ukrainën.

LEXONI GJITHASHTU:

• Hungaria pritet të rafitikojë pranimin e Suedisë në NATO
• Hungaria bllokon miratimin e paketës së sanksioneve kundër Rusisë