Del foto e trafikantit të plagosur nga Policia, AMP: Efektivët s’kanë bërë shkelje

Të tjera detaje kanë dalë lidhur me ngjarjen e ndodhur mbrëmjen e djeshme në Tiranë, ku një efektiv Policie ka plagosur një person, Enea Sulejmani.

Krahas Enea Sulejmanit policia ka arrestuar edhe dy shtetasit e tjerë që e shoqëronin, të cilët janë Igli Begaj i ditëlindjes 2004 dhe Shkëlqim Ostreni i ditëlindjes 1998.

Sipas burimeve nga Policia, ngjarja ka ndodhur teksa shtetasi i plagosur, i cili kishte rreth 1 kg kokainë brenda makinës, nuk i ka ndaluar postbllokut të Policisë dhe në tentativë për t’u larguar, ka përplasur automjetin dhe ka rrezikuar jetën e efektivëve.

Personi i plagosur, Enea Sulejmani ka marrë plagë në inde të buta, plumbi nuk i ka prekur asnjë organ jetësor dhe ndodhet jashtë rrezikut për jetën.

Nga hetimet paraprake te kryera nga Agjencia e Mbikqyrjes Policore, nuk rezulton që efektivët të kenë bërë shkelje, për shkak se atyre u është rrezikuar jeta. Tre personat që u arrestuan dyshohet se ishin furnizues të shpërndarësve të drogës në zonën e Xhamllikut dhe do të shkëmbenin drogën tek vendi ku u kapën nga agjentët e antidrogës.

Po ashtu, sipas burimeve bëhet me dije se shtetasi i plagosur Enea Sulejmani është ish-Kryetar i Shoqatës së Transportit Ndërqytetas.

Në vendngjarje mbremjen e djeshme kanë mbërritur Drejtori i Përgjithshëm i Policisë së Shtetit, Muhamet Rrumbullaku dhe Drejtori i Policisë së Tiranës, Tonin Vocaj.

Njoftimi i Policisë:

Tiranë-Sot më datë 21.03.2024, në vendin e quajtur rruga “Mihal Duri”, gjatë një operacioni policor të strukturës për Hetimin e Narkotikëve në DVP Tiranë, kanë qenë duke kryer veprime operacionale në kuadër të procedimit penal nr. 496 te vitit 2024, veprime të autorizuara nga organi i Prokurorisë Rrethit Gjyqësor Tiranë.

Gjatë momentit që stuktura operacionale ka tentuar të ndalojë automjetin tip “Volksëagen Tiguan” me ngjyrë të bardhë me targë AB 780 MP, drejtuesi i automjetit nuk i është bindur urdhrave të policisë për të ndaluar dhe ka ecur mbrapsht duke rrezikuar jetën e punonjësve të policisë dhe duke përplasur me qëllim shmangien  automjetin e sherbimit të policisë.

Gjatë tentativës për t’u larguar një nga punonjësit e policisë ka qëlluar me armë në drejtim të automjetit dhe për pasojë është plagosur shtetasi E. S., i cili është dërguar menjëherë në spitalin e traumës nga punonjesit e policisë dhe ndodhet nën kujdesin e mjekëve, jashtë rrezikut për jetën.

Në automjet janë konstatuar dhe dy persona të tjerë të cilët janë shoqëruar në ambientet e DVP Tiranë.

Në automjet është konstatuar një pako me peshë rreth 1 kg brenda së cilës dyshohet se lende narkotike kokainë.

Janë njoftuar strukturat e AMP-se të cilat do të kryejnë veprimet hetimore nën drejtimin e Prokurorisë së Juridiksionit të Përgjithshëm Tiranë për sqarimin e rrethanave të ngjarjes.

AMP, pas kryerjes së veprimeve të para në vendngjarje dhe sqarimit të të gjitha rrethanave do të bëjë njoftim të plotë mbi këtë ngjarje.

LEXONI GJITHASHTU:

• Trafikanti në Tiranë tenton t’i ikë postbllokut dhe godet policët, efektivi e plagos
• FOTO| Pako e kokainës në makinë, kush është trafikanti i arrestuar në Tiranë