Sulmi ndaj policit në Shkodër pas konfliktit me fqinjin, u shkrep dhe arma e zjarrit

Të tjera detaje kanë dalë lidhur me ngjarjen e ndodhur në Shkodër, ku efektivi i policisë Admir Okaj është sulmuar me sende të forta nga persona të paidentifikuar.

Sipas burimeve për Euronews Albania, bëhet me dije se ngjarja ka ndodhur pas një konflikti që ai ka pasur me një prej fqinjëve të tij.

Po ashtu mësohet se arma e shërbimit të policit është shprepur në mënyrë të pavullnetshme, por pa shkaktuar dëme në njerëz.

Ndërkohë vijon puna për zbardhjen e plotë të rrethanave të ngjarjes.

Njoftimi:

Rreth orës 15:45, dyshohet se gjatë një konflikti të çastit, për motive të dobëta, shtetasi O. G., 47 vjeç, ka dëmtuar në kokë, me sende të forta, shtetasin A. O., 49 vjeç, banues në Shkodër (punonjës policie, jashtë shërbimit), i cili po merr mjekim në spitalin rajonal të Shkodrës dhe është jashtë rrezikut për jetën.

Gjatë konfliktit dyshohet se arma e shërbimit e punonjësit të Policisë është shkrepur në mënyrë të pavullnetshme, por pa shkaktuar dëmtime.

Shërbimet e Policisë, me marrjen e njoftimit, shkuan menjëherë në vendin e ngjarjes dhe vijojnë krehjen e zonës, për kapjen e 47-vjeçarit.

Grupi hetimor, në drejtimin e Prokurorisë, vijon punën për sqarimin e plotë të rrethanave të ngjarjes.

Ndërkohë, në lidhje me këtë ngjarje, po kryen veprime edhe AMP, për të zbardhur rrethanat e përdorimit ose jo të armës së zjarrit, si dhe për të përcaktuar nëse shkrepja e armës ka qenë e pavullnetshme.

LEXONI GJITHASHTU:

• Shkodër/ Goditet me sende të forta në kokë një efektiv policie (Emri)
• Shpërthim me lëndë plasëse në derën e një banesë në Shkodër