“PD, destabilizim me COVID” Rama thirrje Bashës: Frenoni mitingjet, kufizoni pjesëmarrjen

Kryeministri Edi Rama kritikoi sot fushatën e opozitës, jo për shkak të programit, por për shkak të tubimeve që sipas tij mund të çojnë vendin në destabilitet, pasi mund të sjellin një përhapje masive të COVID-19.

Takimet elektorale të kreut të opozitës Lulzim Basha, që shpesh kanë përfunduar në mitingje, kryeministri i ka komentuar si një rrezik real të destabilizimit, për shkak të rriskut të madh të përhapjes së covidit.

“[…] është fare e qartë që rreziku edhe i destabilizimit të procesit zgjedhor për shkak të humbjes që afron gjithmonë e më shumë është prezent. Mblidhen për të shpërndarë covidin te njëri tjetri me dy gishta dhe për të uruar karvanin e fitores. Të gjithë ata që janë aty në ato tufat e organizuara gjoja spontane,” – tha Rama.

Rama i ka bërë thirrje kreut të PD-së që të ndalojë mitingjet në kuadër të zgjedhjeve të 25 prillit, për shkak të masave anti-COVID. 

“Unë dëshiroj t’i bëj thirrje publikisht Lulzim Bashës dhe opozitës, që të frenohen nga dhënia e këtyre shfaqjeve absurde, që jo vetëm janë shumë dëmtuese, janë çedukuese, janë të pamoralshme në këtë fushë beteje,” – vijoi Rama.

Rama kishte zgjedhur parkun arkeologjik të Apolonisë për të prezantuar kandidatët për deputetë të qarkut Fier. Dy kandidatë, Bashkim Fino dhe Nimet Musai nuk ishin prezent pasi janë te prekur nga COVID-19, dhe ky ishte një rast që Rama të apelonte sërish në adresë të opozitës për të riparë numrin e personave të lejuar në një takim.