Basha fton socialistët e Vlorës t’i bashkohen PD: Shqiptarët meritojnë përfaqësimin e duhur

Kreu i Partisë Demokratike Lulzim Basha ishte sot në Vlorë ku u takua me qytetarë, fermerë dhe artistë.

I pyetur nga Euronews Albania lidhur me fushatën denigruese të nisur nga kryeministri Edi Rama kundrejt figurave të PD si Bujar Leskaj tha se Vlora dhe gjithë Shqipëria meritojnë përfaqesimin e duhur dhe Vlora do të përkrahë masivisht kandidatët dhe Partinë Demokratike.

“Jam i mrekulluar nga pritja e vlonjateve sot dhe dua t’i falënderoj nga zemra banorët krenarë dhe kryelartë të qytetit të Pavarësisë të qytetit të Flamurit. Vlora dhe gjithë Shqipëria meritojnë përfaqësimin e duhur me njerëz me integritet, intelektualë me kontribute, me specialistë të zote dhe lista e Vlorës dhe e gjithë Shqipërisë i ka të gjitha këto kualitete.

Tetë vite me radhe Edi Rama ka nëpërkëmbur Vlorën dhe vlonjatët, ka nëpërkëmbur Shqipërinë. 8 vite me radhe ka premtuar, por ka dështuar në mbajtjen e premtimeve.  Premtoi 300 mije vende pune, por emigracioni i rinisë vlonjate është në përmasa të frikshme. Universiteti i Vlorës dhe rinia vlonjate e ndiejnë këtë, sipërmarrja gjithashtu. Ka ardhur koha për ndryshim.

Lidhur me përjashtimin e kryetarit të bashkisë së Vlorës Dritan Leli, nga fushata e PS, Basha duke iu përgjigj interesit të gazetarëve tha se anija e se keqes tashmë ka nisur të mbytet ndërsa ftesa ime për çdo socialist të ndershëm është t’i bashkohen Partisë Demokratike ‘për ndryshimin që doni ju dhe familjet tuaja’.