Kontrasti i pabarazisë, ASD: 4.5% zotërojnë 60% të depozitave, 1/3 kanë 0 lek

Një e treta e shqiptarëve nuk kanë asnjë lek në llogaritë e tyre bankare, ndërkohë që një pakicë prej 4.5% zotërojnë 60% të totalit të lekëve të depozituara në bankat e nivelit të dytë në rang vendi.

Në fund të vitit 2023 numri i llogarive bankare arriti 2.66 milion dhe në to kishte gjithsej 1.2 trilionë lekë.

Megjithatë pjesa më e madhe e këtyre llogarive nuk kanë asnjë lek të depozituar. Konkretisht nga totali i llogarive të hapura në fund të 2023, 34% të këtyre depozitave, rreth 898 mijë, regjistrojnë 0 deri në 100 lek të depozituara.

Nga ana tjetër 62% e depozitave, të cilësuara “të vogla” zotërohen nga individë të cilët kanë në llogaritë e tyre nga 100 deri në 2.5 milion lekë, nivel ky maksimal i mbulimit të sigurimit, sipas agjencisë së Sigurimit të Depozitave.

Shuma e depozitave e cila u përket këtyre depozituesve arriti në vlerën 509.6 mld lekë, ose 42% e totalit të kapitalit të depozituar nëpër banka në rang vendi.

Por nga ana tjetër një pakicë prej 4.5% zotëron mbi 60% të totalit të depozitave në lek. Sipas Agjencise së Sigurimit për Depozitat, keta depozitues zotërojnë 698.9 mld lek, pra pjesën më të madhe të kapitalit të depozituar në bankat e nivelit të dytë.

Të dhënat dëshmojnë një kontrast dhe hendek të thellë, ku më pak se 5% të individëve zotërojnë mbi 60% të kapitalit bankar, ndërkohë që një shumicë dërrmuese nuk arrin dot të kursejnë më tepër se 2.5 milion lekë në llogaritë e tyre.

LEXONI GJITHASHTU:

• S&P përmirësoi vlerësimin për Shqipërinë, Mete: Tregon situatën e mirë ekonomike
• Krujë, nëna hodhi beben në lumë/ Psikiatri: Shkak depresioni dhe ekonomia