Dëshira për triumfin e PD në zgjedhje në rritje, analistët tregojnë shkaqet

Sondazhi i tretë kombëtar zgjedhor i kompanisë MRB për Euronews Albania tregoi se 44% e shqiptarëve do të dëshironin që zgjedhjet e 25 prillit t’i fitonte Partia Socialiste, ndërsa 35.1% do të dëshironin që të fitonte Partia Demokratike.

Krahasuar me sondazhet e tjera, vetëm PD rezulton të ketë rritje në përqindje nga 30.6% në 35.1% ndërsa diferenca mes dy partive të mëdha është ngushtuar nga 15% në 8.9%.

Ish-ministri i Drejtësisë, Ylli Manjani tha në emisionin “Barometri Politik” se nga të dhënat e sondazhit rezulton se PS është njëkohësisht më e dëshirueshmja, por edhe me e trishtueshmja në raport me partitë e tjera tek qytetarët, kur ata pyeten mbi dëshirat e tyre për të qenë fituese ose jo në zgjedhjet e 25 prillit.

“Ky grafik mat dëshirën e njerëzve. PS vërtet ka shumicën e dëshirave të njerëzve që i duan fitoren, ndërsa kur pyeten po të njëjtët njerëz thonë se do ndiheshin të trishtuar nëse fiton PS-ja.

Pra, PS është edhe më e dëshirueshmja dhe me e trishtueshmja në raport me partitë e tjera. Konkluzioni që doja të nxirrja është ky, që shumica e shqiptarëve të pyetur dëshirojnë që PS të fitojë, por po e njëjta shumicë do ndiheshin të trishtuar nëse do fitonte”, tha z. Manjani.

Për drejtuesin e emisionit ‘Me pak Fjalë’, Neritan Sejamini, kjo shifër shkon në favor të PD dhe të opozitës, duke qenë se për PS sipas tij situata është e qartë dhe në kampin qeveritar nuk ka dhe nuk parashikohen ndryshime në këtë aspekt.

Sipas tij, nisur nga të dhënat e sondazhit që e nxjerrin në rritje PD, të paktën 35 për qind e votave të shqiptarëve shkojnë për PD, dhe po ti shtosh këtu votat e LSI.

“Ky rezultat, 35 për qind do të dëshironin të fitonte opozita, tregon se gjithë 35 përqindëshi është potencial votash për opozitën, madje edhe 12,9 për qind i atyre që nuk janë përgjigjur janë votues potencialë të opozitës.

Ajo që është e qartë është se të paktën 35 për qind e shqiptarëve mund të votojnë për PD. Dhe nëse rezultati do të jetë nën 35 për qind tregon se PD nuk po përmbush pritshmëritë. Do të thotë se në këto zgjedhje, nëse do të punojë PD, të paktën 35 për qind e shqiptarëve do të votonin PD, po të shtoje këtu edhe votat e LSI dhe partive të tjera rezultati është shumë i favorshëm për opozitën”, tha z. Sejamini.

LEXONI GJITHASHTU:

• Sondazhi/ Nëse zgjedhjet do të mbaheshin të dielën, 41.3% e qytetarëve do të votonin PS, 30.8% PD dhe 7.6% LSI 
• Shumica e shqiptarëve besojnë se PS do të dalë e para në zgjedhje, por diferenca me PD-në është ngushtuar 
• Gara për 71 mandatet, shumica e shqiptarëve besojnë se do t’i marrë partia fituese e zgjedhjeve