A do ta njoh Greqia-Kosovën? Basha: Vendi fqinj ka adoptuar një qëndrim konstruktiv

Kryedemokrati Lulzim Basha është shprehur se i takon politikës në Kosovë dhe kujtdo tjetër që ka marrëdhënie pozitive me Greqinë, të punojnë në drejtim të procesit të njohjes së Kosovës nga vendi fqinj.

Komentet Basha i bëri në një lidhje për Euronews Albania, ku tha se Greqia ka adoptuar një qëndrim mjaft konstruktiv në raport me Kosovën dhe zhvillimet atje.

Sipas Bashës, ky qëndrim pozitiv i Greqisë, kulmoi me përgatitjen e raportit për anëtarësimin e Kosovës në KiE, nga motra e kryeministrit të Greqisë, Kyriakos Mitsotakis, Dora Bakojanis.

“Dora Bakojanis ka pranuar që të jetë reporterë në një çështje që askush tjetër nuk do të pranonte ta merrte përsipër. Është futur në mes Kosovës dhe Serbisë në diçka ku deri tani Eskobar, Lajçak dhe të tjerët nuk kanë arritur dot objektivat e vëna vetes së tyre. Dhe ia doli me sukses. Sepse suksesi matet me produktin.

Produkti është vota e më shumë se 2/3, 82 % e Asamblesë Parlamentare votoi raporton e saj dhe i hapi rrugë anëtarësimit të Kosovës në Këshillin e Europës. Se si e arriti është një kombinim i përvojës dhe personalitetit të saj dhe serbët kanë bërë një gabim që kanë menduar se përmes bullizimit do të stepnin Bakojanis. Ajo është një grua e fortë.

Kjo nuk ka lidhje me qëndrimin e Greqisë, është një dosje më vete. I takon kryeministrit Kurti dhe kujdo tjetër që është në marrëdhënie pozitive me Greqinë, që të bëj gjithçka për të avancuar njohjen nga Greqia, ndërkohë që Greqia ka adoptuar një qëndrim mjaft konstruktiv në raport me Kosovën dhe zhvillimet atje”, tha Basha.

LEXONI GJITHASHTU:

• Basha nga KiE: Serbia kreu sulm paraushtarak në veri të Kosovës, skenar si i Krimesë
• “Rusia duhet të paguajë”- Basha në KiE: Vendimi, si pengesë ndaj çdo agresioni