Përmbytjet|Shqiptarja nga Dubai: Qielli u bë jeshil nga stuhia, s’e kisha parë kurrë

Pedagogia shqiptare në Dubai, Ajrina Hysaj, ka treguar situatën e përmbytjeve të ditëve të fundit atje, ku stuhi dhe shira të shumtë kanë “mbërthyer” vendin.

Në emisionin “Good Morning Albanians” në Euronews, ajo tha se ditën e martë, kur edhe nisi stuhia, qytetarët ishin paralajmëruar dhe shumica e tyre ndodheshin në shtëpi.

Ajo tha se ajo ditë ishte tejet e frikshme, pasi sipas saj, qielli u bë jeshil dhe stuhia ishte tepër e fortë, një stuhi që Hysaj nuk e kishte parë ndonjëherë.

“Situata është e vërtetë, në zona të ndryshme është përjetuar në mënyra të ndryshme. Këtu ku jemi ne, ne nuk kemi pasur asnjë problem, por kemi parë gjithçka që ka ndodhur. Kemi parë qiellin jeshil, kemi parë shiun, kemi parë një stuhi të frikshme.

Ne në Shqipëri kemi shi, por këtë stuhi të frikshme nuk e kisha parë ndonjëherë. Kishte ditë në fakt që qeveria këtu thoshte që do të ketë reshje dhe stuhi. Shkollat ishin të mbyllura pas të hënës. Kjo stuhi nisi në Oman, ku vdiqën disa njerëz.

Ne të martën ishim në shtëpi. Ka ditë që në Dubai qielli është i errët. Jo ditë, por ka muaj edhe më shumë. Kjo mund të jetë nga retë. Kanë qenë re të dendura. Këtu është freskuar shumë në fakt”, tha Hysaj.

LEXONI GJITHASHTU:

• VIDEO| Dubai përmbytet nga uji, brenda 24 orëve ra shi sa për një vit
• Pamjet apokaliptike të përmbytjeve në Dubai, ngjarje historike e motit