Të paktën 85 të vdekur nga përmbytje në Brazil, mbi 100 mijë të evakuar

Presidenti brazilian Luiz Inácio Lula da Silva i ka kërkuar Kongresit të shpallë gjendjen e jashtëzakonshme për shkak të përmbytjeve të shkaktuara nga shirat e dendur që kanë vrarë të paktën 85 persona në shtetin më jugor të Rio Grande do Sul, sipas të dhënave të fundit.

Kjo masë do të lejonte miratimin e alokimeve shtesë shtetërore pa qenë nevoja të respektohen kufizimet e parashikuara nga rregullat fiskale që hynë në fuqi vitin e kaluar.

“Ne ende nuk kemi një vlerësim se çfarë do të jetë e nevojshme. Vetëm kur uji të zvogëlohet do të shohim shkallën e dëmit”, tha ministri i Planifikimit Simone Tebbet, siç raportohet nga Reuters.

Guvernatori i Rio Grande do Sul, Eduardo Leite, tha se numri i të vdekurve mund të rritet ndjeshëm.

Më shumë se 130 njerëz janë ende të zhdukur pasi përmbytjet goditën më shumë se dy të tretat e gati 500 qyteteve të vendit, duke zhvendosur rreth 150,000 njerëz, tha Administrata e Mbrojtjes Civile e vendit.

Përmbytjet shkatërruan rrugë dhe ura në disa qytete, duke shkaktuar rrëshqitje dheu. Kushtet e motit u përmirësuan të hënën, por sinoptikanët thanë se reshje të dendura priten sërish midis 10 dhe 15 majit.

LEXONI GJITHASHTU:

• Përmbytje në Brazil, shembet diga e rritet numri i të vdekurve në Rio Grande do Sul
• Të paktën 23 të vdekur nga shirat e rrëmbyer në Brazil, shpërngulën 5000 njerëz