Zbulohet mozaiku i rrallë në Durrës, pjesë e pishinës së vilës antike

Një tjetër mozaik ka dalë në dritë në sitin më të ri arkeologjik të qytetit të Durrësit, në kantierin e ndërtimit të shkollës së mesme “Gjergj Kastrioti”.

Në kompleksin e vilave të shekullit të I & II të erës sonë, që doli në dritë në muajin tetor të vitit të kaluar, grupi i arkeologëve ka zbuluar paraditen e kësaj të enjte këtë mozaik në ngjyrë qumështi, me gurë blu dhe një tjetër në ngjyrë të kuqe, pjesë e pishinës së vilës antike.

“Kemi një zbulim sensacional, shumë interesant. Është zbulimi i një mozaiku të dytë”, tha Luan Përzhita, arkeolog.

 “Ky është i ndryshëm nga mozaiku i parë, është në ngjyrë bezhë, ose ngjyrë pane dhe i alternuar me disa pika në ngjyrë blu.”

Arkeologu që po ndjek gërmimet në këtë zonë tregon edhe detaje për këtë zbulim.

 “Ky mozaik është zbuluar në pishinën e kësaj vile. Pra kemi të bëjmë me ndërtimin e një pishine, e cila tregon për një nivel të lartë nga mënyra e ndërtimit dhe organizimit të saj”, tha Luan Përzhita, arkeolog.

Bashkë me këtë mozaik, kanë dalë në dritë edhe afreske shumëngjyrëshe, pjesë e dekorit të vilës që në kohët antike ndodhej shumë pranë amfiteatrit të qytetit.

LEXONI GJITHASHTU:

• Nën ujërat e zeza, “del në dritë” mozaiku i rrallë 1900-vjeçar në Durrës
• Mozaiku i rrallë 1600-vjeçar gjendet i paprekur në Siri