Pas 7-vitesh në Paris, Mbappe konfirmon largimin nga PSG

7 vite në Paris, afro 200 gola të shënuar me fanellën e skuadrës kampione, Kylian Mbappe ka njoftuar zyrtarisht largimin nga skuadra. Sulmuesi i cili konsiderohet ndër më të mirët në Evropë, ka vendosur të mos rinovojë me PSG-në, ndërsa në verë do të dalë si lojtar i lirë, e me gjasa destinacioni i radhës është Reali i Madridit. Nëpërmjet një video të postuar në rrjetet sociale, Mbappe bën me dije se ndaj Toulouse do të jetë ndeshja e fundit në Parkun e Princave, ku do të zhvillohet dhe një ceremoni falenderimi ndaj tij.

Kylian Mbappe u vendos për herë të parë në Paris në vitin 2017, ku qëndroi në formë huazimi, më pas në mënyrë zyrtare duke u bërë pjesë e klubit. Përgjatë qëndrimit aty, 25-vjeçari ka fituar 14 trofe, mes tyre kupën e kampionatin, por pa mundur të sjellë trofeun e Champions League në shtëpi. Në aventurën e fundit në këtë kompeticion, francezët u eliminuan nga Dortmundi, që është dhe ekip finalist.

Ofertat në drejtim të tij kanë qenë të shumta, madje ato nga Arabia Saudite kanë kaluar çdo lloj kufiri, por nuk mundën ta bindin sulmuesin. Premier League po ashtu ka shprehur interes, por futbollisti është i bindur, që ëndrra e tij është të veshë fanellën e Los Blancos.

LEXONI GJITHASHTU:

• Interi shpallet kampion i Italisë, gdhend yllin e dytë në fanellë
• Dortmund triumfon ndaj PSG në gjysmëfinalen e parë të Champions League