Dortmund triumfon ndaj PSG në gjysmëfinalen e parë të Champions League

Raste shënimi dhe lojë e bukur, por përballja mes Dortmundit dhe PSG-së prodhoi vetëm 1 gol që i dha fitoren verdhezinjve të Edin Terzic. Në një Signal Iduna Park që nuk zhgënjen kurrë me atmosferë spektakolare, ku e gjithë tifozëria ishte veshur në të verdhë, vendësit zhvilluan paraqitjen e sezonit edhe pse mund të kishin fituar më tepër.

Shance pati dhe skuadra kampione e Francës, por Kobel ishte i pakalueshëm. Në nisje të lojës Dortmundi u përpoq të qarkullojë më tepër topin, madje duke rrezikuar portën kundërshtare me Sabitzer. Në vijim Psg pati më tepër iniciativë, por nuk kishte saktësinë e duhur. Për të ardhur në momentin kyç të ndeshjes, në minutën e 36′ ku Schlotterbeck jep një super asist për Fullkrug me gjermanin gjakftohtë që mposhti Donarummën me një gjuajtje potente me të majtën.

Në pjesën e dytë panorama ishte e njëjtë, herë PSG e herë Dortmundi me qarkullimin e topit, me rastin më të mirë ku Mbappe goditi shtyllën. Shifrat mbetën të pandryshuara më tej, me lojën e përfunduar 1-0, duke lënë të hapur çështjen kualifikim.

LEXONI GJITHASHTU:

• Interi shpallet kampion i Italisë, gdhend yllin e dytë në fanellë
• Reali mposht Barcelonën 3-2, Xavi akuza ndaj arbitrit pas sfidës