Vdekja e punëtorit 24-vjeçar në gurore, arrestohet drejtuesi teknik i firmës

Drejtuesi teknik i gurores në fshatin Brataj, ku pasditen e të martës (21 maj), humbi jetën një punëtor, është arrestuar nga policia e Vlorës.

Përmes një njoftimi për media policia bën me dije se arrestimi i drejtuesit teknik është bërë për shkak të mosmarrjes së masave për zbatimin e rregullave të mbrojtjes në punë.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme.

“Në vijim të veprimeve hetimore për zbardhjen e rrethanave të ngjarjes së ndodhur ditën e djeshme, në fshatin Brataj, ku gjatë punës në gurore, humbi jetën pasi dyshohet se gjatë punimeve me skrep u dëmtua nga gurët, shtetasi J. V., 24 vjeç, specialistët për Hetimin e Krimeve të Stacionit të Policisë Selenicë kanë arrestuar shtetasin:

E. B., 34 vjeç, banues në Tiranë, me detyrë drejtues teknik i gurores në fshatin Brataj, pasi dyshohet se nuk ka marrë masat për zbatimin e rregullave të mbrojtjes në punë, në këtë gurore.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme, për veprën penale “Shkelja e rregullave të mbrojtje në punë”, njofton policia.

LEXONI GJITHASHTU:

• Aksidenti me 1 të vdekur në minierë, arrestohet administratori
• Në kërkim për tentativë vrasje në Bullgari, arrestohet në Durrës shqiptari i Kosovës