Hungaria kërcënim për unitetin në BE, Gjykata Evropiane e gjobit me 200 milionë euro

Gjykata Evropiane e Drejtësisë ka gjobitur Hungarinë me 200 milionë euro për shkelje të rënda të ligjit të BE-së për azilin. Gjykata vendosi se Hungaria ka kufizuar në mënyrë sistematike procedurat e azilit për personat që kërkonin mbrojtje ndërkombëtare, duke ndaluar aplikantët në zonat e tranzitit dhe duke i dëbuar ata pa u lejuar të qëndrojnë në vend.

Hungaria duhet të paguajë gjithashtu një gjobë prej 1 milion euro për çdo ditë vonese në zbatimin e vendimit. Paratë do të zbriten nga pjesa e saj në buxhetin e BE-së, i cili është aktualisht i ngrirë për shkak të problemeve të ngjashme ligjore.

Gjykata kritikoi Hungarinë për shpërfillje të vazhdueshme të vendimeve të mëparshme dhe për shmangien e qëllimshme të zbatimit të legjislacionit të BE-së. Kjo sjellje konsiderohet si një kërcënim serioz për unitetin e ligjit të BE-së dhe për interesat e azilkërkuesve.

Kryeministri hungarez Viktor Orban ka një qëndrim të ashpër ndaj migracionit që nga ardhja në pushtet, duke shkaktuar tensione të vazhdueshme me Brukselin. Muajin e kaluar, Hungaria votoi kundër Paktit të Ri për Migracionin dhe Azilin, duke thelluar edhe më tej mosmarrëveshjet me BE-në.

LEXO GJITHASHTU:

• Stoltenberg: Hungaria nuk do ta bllokojë ndihmën e NATO-s për Ukrainën
• NATO ultimatum Hungarisë, Stoltenberg kokë më kokë me Orban