Nesër protesta e opozitës para Bashkisë| Policia merr masa, rrugët që bllokohen

Policia e Shtetit njofton se ka marrë masa organizative dhe operacionale për të garantuar rendin publik dhe sigurinë gjatë tubimit të planifikuar nga “Aleanca për Mbrojtjen e Teatrit”, që do të zhvillohet nesër, më 21 qershor 2024, në orën 10:00, pranë Bashkisë së Tiranës.

Në zbatim të planit të masave, Policia e Shtetit bën me dije se nesër, nga ora 09:30 e në vijim, do të ketë bllokim të përkohshëm të qarkullimit të mjeteve në bulevardin kryesor pranë Bashkisë së Tiranës. Për këtë arsye, sugjerohet përdorimi i rrugëve alternative, si Unaza e Mesme dhe Unaza e Madhe, deri në përfundimin e tubimit.

Gjatë disa tubimeve të mëparshme të zhvilluara nga “Aleanca për Mbrojtjen e Teatrit” në sheshin para Bashkisë Tiranë, janë shënuar raste të përsëritura të kundërshtimit të forcave të policisë dhe përdorimit të sendeve të rrezikshme, duke përfshirë molotovë, që kanë rrezikuar jetën dhe shëndetin e punonjësve të policisë dhe pjesëmarrësve.

Drejtoria Vendore e Policisë Tiranë njofton se “respekton të drejtën e qytetarëve për të organizuar dhe marrë pjesë në tubime paqësore. Policia përsërit thirrjen për organizatorët, drejtuesit dhe pjesëmarrësit që të respektojnë ligjin dhe të distancohen nga çdo akt dhune”.

LEXO GJITHASHTU:

• Mbyllet pas dy orësh e gjysmë tubimi i opozitës, largohen protestuesit
• Mijëra njerëz mblidhen në Varshavë për tubimin parazgjedhor të kryeministrit Tusk